“Bitki mühafizəsi haqqında” Azərbaycan respublikasının qanunu

Azəbaycan respublikası ərazisində bitki müfafizəsinin təşkili və həyata keçirilməsinin hüquqi əsaslarını müəyyən edən bu Qanun VI fəsil və 17 maddədən ibarətdir. Qanun 3 dekabr 1996-cı ildə Prezident tərəfindən imzalanmışdır.

         Bitki mühafizəsi haqqındakı Qanunun məqsədi – bitkilərin və onların məhsullarının ziyanverici, xəstəlik və alaq otlarından qorunması məqsədilə elmi cəhətdən əsaslandırılmış kompleks tədbirlərin həyata keçirilməsidir.

         Qanunvericiliyə görə, dövlət bitki mühafizə xidməti mülkiyyət formasından və tabeliyindən asılı olmayaraq, kənd təsərrüfatı müəssisələrində, idarələrində və təşkilatlarında, bitki mühafizəsi tədbirləri həyata keçirilən digər sahələrdə fitosanitar nəzarətin vəziyyətinə elmi əsaslarla istifadə edilməsinə tam məsuliyyət daşıyırlar.

         Bu Qanuna görə - Dövlət bitki mühafizə xidməti bitki mühafizəsi sahəsində, habelə pestisidlərin, bioloji və digər bitki mühafizə vasitələrinin toksikoloji təsiri, ətraf mühitin çirklənməsi, keyfiyyətini itirmiş və istifadəsi qadağan olunmuş kimyəvi maddələrin zərərsizləşdirilməsi məsələlərində ekologiya və təbiəti mühafizə, sanitariya-epidemioloji, baytarlıq və bitki karantini üzrə dövlət xidmətləri ilə birlikdə fəaliyyət göstərir (maddə 7).

         Qanunun 8-ci maddəsində Dövlət fitosanitar nəzarətinin vəzifələri müəyyənləşdirilmişdir. Burada göstərilir ki, Dövlət fitosanitar nəzarəti - dövlət bitki mühafizə xidmətinin ziyanverici və xəstəliklərinin, habelə alaq otlarının aşkar edilməsi, onların məhsullarının qorunması üçün  tədbirlərin görülməsi, bitki mühafizəsi sahəsində Azərbaycan respublikasının  qanunvericiliyin pozulması hallarının aşkar edilməsi və aradan qaldırılmasına yönəldilmiş fəaliyyətdir.

         Qanunun IV fəslində (11-12-ci maddələr) göstərilir ki, bitkiləri ziyanverici, xəstəlik və alaq otlarından qorumaq üçün mütləq dövlət sınağından keçmiş və respublikamızda tövsiyə edilmiş, kimyəvi, bioloji və digər bitki mühafizə vasitələri, xüsusi maşın və aparatlar tətbiq edilir. Mövcud qanuna görə, bu və ya başqa ölkələrdə dövlət sınağından keçməmiş, qeydə alınmamış, habelə istifadəsi qadağan olunmuş preparatların istehsalı, satışı, xaricdən gətirilməsi və tətbiqi qadağan olunur.

         Qanunun V fəslində  - bitki mühafizəsi sahəsində müəssisələrin, idarələrin, təşkilatların, torpaq mülkiyyətçilərinin, torpaq istifadəçilərinin və vətəndaşların vəzifələri təsbit edilmişdir. Burada göstərilir ki, bitki mənşəli məhsulların tərkibində pesrisidlərin, nitratların, həyat üçün təhlükəli olan müxtəlif zəhərli maddələrin qalıq miqdarı yol verilən normativ səviyyədən artıq olarsa, onun satışına icazə verilmir.

             Qanunun VI fəslində qeyd edilmişdir ki, bitki mühafizəsi haqqında qaydaları pozduqda, kənd təsərrüfatı məhsularını və ətraf mühiti pestisidlərlə və müxtəlif zəhərli maddələrlə çirkləndirdikdə, tərkibində digər müxtəlif zəhərli maddələrin qalıq miqdarı yol verilən normativ səviyyədən artıq olan məhsuları satdıqda və mövcud qanunun pozulmasının digər hallarında respublikamızın qanunvericiliyində nəzərdə tutulmuş qaydada intizam, maddi, inzibati və cinayət məsuliyyətinə cəlb edilirlər.