“Əhalinin sağlamlığının qorunması haqqında” Azərbaycan respublikasının qanunu

X fəsil, 62 maddədən ibarət olan bu Qanun 26 iyun 1997-ci il tarixdə Prezident tərəfindən imzalanmışdır.

         Bu Qanun əhalinin sağlamlığının qorunması sahəsində vətəndaşlarla dövlət orqanları, eləcə də dövlət və qeyri-dövlət səhiyyə sistemlərinin subyektləri arasında yaranan münasibətləri hüquqi cəhətdən tənzimləyir. Əhalinin sağlamlığının qorunması hər bir insanın fiziki və ruhi sağlamlığının mühafizəsinə, onun fəal uzun ömürlüyünün artırılmasına, tibbi yardımla tə’minatına yönəldilmiş siyasi, iqtisadi, hüquqi, elmi, tibbi, sanitariya-gigiyena xarakterli tədbirlərin məcmusundan ibarətdir.

         Qanunvericilikdə əhalinin sağlamlığının qorunmasının əsas prinsipləri (maddə 1), dövlət və qeyri-dövlət səhiyyə sistemi (maddə 4-5), sağlamlığın qorunması sahəsində vətəndaşların, əcnəbilərin və vətəndaşlığı olmayan şəxslərin hüquqlarının qorunması (maddə10) müəyyənləşdirilmiş və əhalinin sağlamlığının qorunması sahəsində ailənin (maddə16), hamilə qadınların və anaların (maddə 17), yetkinlik yaşına catmayanların (maddə 18), hərbçilərin (maddə 19), pensiyaçıların (maddə 20) hüquqları şərh edilmişdir.

         Qanunun 22-ci maddəsində fövqə’ladə hallarda ziyan çəkmiş və ekoloji şəraitin əlverişsiz olduğu ərazilərdə yaşayan vətəndaşların sağlamlığının qorunması sahəsində hüquqları göstərilir.

         Bundan başqa, Qanunda Ailənin planlaşdırılması  və insanın reproduktiv funksiyalarının tənzimlənməsi (29-31-ci maddələr), vətəndaşlara tibbi-sosial yardımın həyata keçirilməsinə zəmanətlər (32-41-ci maddələr), tibbi ekspertiza (42-45-ci maddələr), tibb və əczaçılıq işçılərinin hüquqları və sosial müdafiəsi (46-56-cı maddələr) məsələləri də hüquqi cəhətdən müəyyənləşdirilmişdir.

            Qanunun IX fəsli (57-60-cı maddələr) vətəndaşların sağlamlığına vurulan zərərə görə mə’suliyyət məsələsinə həsr edilmişdir. Bu fəslin 57-ci maddəsində göstərilmişdir ki, ətraf mühitin çirklənməsi nəticəsində vətəndaşların sağlamlığına vurulan ziyan qanunvericilikdə müəyyən edilmiş qaydada ziyan vuran hüquqi və fiziki şəxslər tərəfindən ödənilir.