“Azərbaycan respublikası Su Məcəlləsinin təsdiq edilməsi haqqında” Azərbaycan respublikasının qanunu 

        Dörd bölmə, XVII fəsil və 105 maddədən ibarət oıan bu qanunvericilik 27/XII – 97-ci il tarixdə Prezident tərəfindən təsdiq edilmişdir.

         Bu qanun Azərbaycan respublikasında su obyektlərinin istifadəsi və mühafizəsi ilə bağlı hüquq münasibətlərini tənzimləyir. Respublikanın su obyektləri, Xəzər dənizinin Azərbaycana mənsub olan bölməsi hüquqi cəhətdən Azərbaycan xalqının milli sərvətidir, əhalinin həyat və fəaliyyətinin əsası kimi istifadə edilir və qorunur, flora və faunanın mövcudluğunu təmin edir.

         Su məcəlləsinin I bölməsində qanunvericiliyin mahiyyəti, su obyektlərinin istifadəsi və mühafizəsi ilə bağlı münasibətlərin tənzimlənməsi, respublikanın yeraltı, yerüstü və sərhəd su obyektləri, su münasibətlərinin subyektləri, su obyektləri üzərində dövlət və bələdiyyə mülkiyyəti şərh edilmişdir.

         Məcəllənin II bölməsi - su obyektlərinin istifadəsi və mühafizəsi sahəsində idarəetmənin təşkilinə həsr edilmişdir. Bu bölmədə (16-29-cu maddələr) su obyektlərinin istifadəsi və mühafizəsi sahəsində dövlətin vəzifələri və bələdiyyənin səlahiyyətləri, su obyektlərinin dövlət monitorinqi, suların dövlət uçotu, dövlət su kadastrı, su obyektlərinin istifadəsi və mühafizəsi üzərində dövlət nəzarəti müəyyənləşdirilmişdir.

         Qanunvericiliyin III bölməsi (30-95-ci maddələr) su obyektlərinin istifadəsi və mühafizəsi qaydalarını əhatə edir. Bu bölmədə (30-46-cı maddələr) – su obyektlərindən istifadə hüququ, su obyektlərindən istifadənin növləri, su obyektlərinin istifadəyə verilməsi qaydaları, sudan istifadə edənlərin hüquq və vəzifələri, su təsərrüfatı fəaliyyəti nəticəsində dəymiş zərərin ödənilməsi izah edilmişdir. Bundan başqa, su obyektlərindən əhalinin içməli su, müalicə-kurort, sağlamlaşdırma, istirahət və idman məqsədləri üçün istifadə (47-50-ci maddələr), su obyektlərindən kənd təsərrüfatı ehtiyacları üçün istifadə (51-58-ci maddələr), sənaye və hidroenergetika məqsədləri üçün istifadə (59-63-cü maddələr), nəqliyyat ehtiyacları üçün istifadə (64-65-ci maddələr), balıqçılıq və ovçuluq üçün istifadə (66-73-cü maddələr), xüsusi qorunan su obyektlərindən istifadə (74-76-cı maddələr), tullantı suların axıdılması, yanğından mühafizə və digər məqsədlər üçün istifadə (77-80-ci maddələr) qaydaları da Məcəllənin 3-cü bölməsində şərh edilmişdir.

         Qanunvericiliyin III bölməsinin XIV fəslində su obyektlərinin mühafizəsinin ümumi qaydaları təsbit edilmişdir. Burada (81-93-cü maddələr) su mühafızə zonaları, su obyektlərinin çirklənməkdən və zibillənməkdən qorunması, sanitariya mühafizəsi zonalarının müəyyən edilməsi, su obyektlərinə zərərli təsirin yol verilən normaları, su obyektlərində fövqə’ladə ekoloji vəziyyət və ekoloji fəlakət zonaları haqqında hüquqi qaydalar öz əksini tapmışdır. 

         Məcəllənin 94-95-ci maddələrində suların vəziyyətinə təsir edən müəssisələrin, qurğuların və digər obyektlərin yerləçdirilməsi, layihələşdirilməsi, tikilməsi, bərpası və istismarının hüquqi şərtləri ifadə olunmuşdur.

         Qanunun sonuncu bölməsi (IV) su obyektlərinin istifadəsi və mühafizəsi tədbirlərinin iqtisadi tənzimlənməsi, mübahisələrin həll edilməsi su qanunvericiliyinin pozulmasına görə məsuliyyət məsələlərini əhatə edir. Bu bölmədə su obyektlərinin istifadəsi və mühafizəsi tədbirlərinin iqtisadi tənzimlənməsinin prinsipləri (96-cı maddə), sulardan pullu istifadə (97-ci maddə), sudan istifadə haqqının müəyyən edilməsi (98-ci maddə), su obyektlərindən istifadə ilə bağlı ödəmə növləri və qaydaları (99-cu maddə), su obyektlərinin istifadəsi və mühafizəsi üzrə tədbirlərin maliyyələşdirilməsi (100-cü maddə) qaydaları göstərilmişdir.

            Su məcəlləsinin 103-cü maddəsində Azərbaycan respublikasının su qanunvericiliyinin pozulmasına görə məsuliyyət qeyd edilmişdir. Burada göstərilir ki, su qanunvericiliyini pozan vəzifəli şəxslər və vətəndaşlar respublika qanunvericiliyi ilə nəzərdə tutulmuş qaydada mülki, maddi, inzibati və cinayət məsuliyyəti daşıyırlar. Bundan başqa, Məcəllədə özbaşına tutulmuş su obyektlərinin qaytarılması (maddə104) və Su qanunvericiliyinin pozulması ilə vurulmuş zərərin ödənilməsi (105-ci maddə) məsələsi də təsbit olunmuşdur.